Questo post é stato letto 10660 volte!
Cu’ sugnu eu? Nullu e nenti:
nu cocc’i terra…i purvarata
ammenz’a migliardi d’agenti
sparzi ‘nta ll’aria ammorbata;
‘na ‘nticchja i penzeru, i nullu carculatu
nto vortici d’u mundu ormai ‘mpazzutu,
n’attimu i suspiru ‘nta ll’aria libaratu
nto rispiru d’u tempu…ormai perdutu.
Sugnu nenti a cumpruntu d’a saggezza umana
d’a sapienza ‘suberanti d’i grandi penzaturi
d’a scenza chi galoppa e sempi abbrama
sperandu nu jornu u scumpiggi i doluri.
Eu sugnu sulu, e caminu strati strati
i quandu faci jornu e mi risbigghju
pozzu dari sulu amuri i patri
e affettu sinceru pecchì sugnu… figghju.
Tratto dall’antologia “Vuci Senza Tempu”,
Unione Poeti Dialettali Calabresi
Questo post é stato letto 10660 volte!
