Questo post é stato letto 8760 volte!
Suli, ch’ abbrisci ‘a testa d’’i perzuni,
e di luci parinchj la matina,
si’ musica di li megghju canzuni,
bellu comu ‘na rosa senza spina.
Poisìa chi si scrivi quasi sula
quandu d’’u cielu tu ‘nci fai la scrima,
stu cori chi t’ aspetta si cunsula
e ‘ndurca chisti verzi cu’ ‘na rima.
Di russu tu cumpari quand’ arbìja,
quandu surgi di ll’ acqua di lu mari,
scateni ‘nta la ment’’a fantasia
ch’ arricchju ‘a vuc’ i patrima parrari.
Ogni matin’ addaccusì lu viju,
di luci m’incuruna e sentu ‘a paci
dinta i mia e sempi mi ricrìju
pe’ llù sorrisu bellu chi mi faci.
‘U bonu jornu duna. i ‘ssa manera
e certu ca no’ ‘ndaju cchjù turmentu,
‘u cori batti fort’ e sempi spera
mu ‘nci ‘rriva ‘u me’ bbasu cu’ lu ventu
Tratto dall’antologia “Vuci Senza Tempu”,
Unione Poeti Dialettali Calabresi
Questo post é stato letto 8760 volte!
