Questo post é stato letto 6890 volte!
Quant’era bellu u tempu i na vota!
Quandu ancora ca’ tavula consata
ndi cogghiuvumu a sira tutti a rota
nt’ò menzu cu’ ‘na bella brascerata.
Quant’era bellu u tempu du brasceri!
ddu modu sanu e nobili i parrari,
cuntandu fatti di oj e d’ajeri
a menz’a vecchi giuvini e cotrari
Quantu ricordi ndaju di ddu brasceri!
Erinu tempi ‘i fami e carestja,
ddi brasci vivi vivi di bruveri,
sani ricordi di l’infanzia mia.
Chi nostalgia ndaju di ddu brasceri!
Di tempi chi non ponnu cchiu’ tornari,
mamma e patri nostri cunsigghieri,
sulu cu spandi amuri sapi dari.
Quanti cunsigghi cogghija n’torn’ o brasceri,!
Sulu cu’ t’amava ti sapìa dari,
quandu l’omini si ch’erinu veri
non com’a’ ora schiavi i dinari.
Po’ quandu ‘rriva l’ura du’ mangiari,
non si senti moviri nu biccheri,
tutti ntè mani ndannu ‘u cellulari
ed éu….rimpiangiu i tempi du’ brasceri.
Tratto dall’antologia “Vuci Senza Tempu”,
Unione Poeti Dialettali Calabresi
Questo post é stato letto 6890 volte!
