Questo post é stato letto 8900 volte!
Pe’ tia, chi partist’ i pochi jorna,
scrivu ddu’ palori…pecchí ti pensu,
pecchí d’’u scuru ‘a luci sempi torna
e provu a tuttu chist’ u dugn’ ‘u sensu!
La pinn’ esti guidata d’’u cervellu
u’ cori ancora suffri, ‘ntracojatu…
e tornu a quand’ ancora cotrarellu
mi ‘mparasti lu giustu e lu sbagghjatu:
“ ‘A vita vaji avanti, mala sorti,
non si pò fermar’ è ‘a veritati,
testa supa d’’i spalli, semp’ accorti,
rispettu, ‘docazion’ e dignitati…
Bontarusu cerca u sí ed onestu,
ma dritt’ ‘a schjn’ e mai ‘mbasciuni,
arridi sempi e vi’ ca ‘u restu
‘nto cori non ti pis’ e no’ sbuluni
Ch’ ‘a vita pe’ quantu traditura
è bella mu si vivi ‘n armonía,
i quandu surgi ‘u suli a chi scura…
Fa’ chillu ch’ eu ti dicu, sent’ a mia,
Arricchja ssi palori e vivi bbonu,
puru cu’ tutt’ i guai ch’ ‘a sorti manda
e vidi ca cchjù duci senti ‘u sonu
d’’a musica chi veni d’ ogni vanda…”
Chillu chi dicisti è ‘nsignamentu
i com’ ‘ a vita ndavarria m’ affruntu,
soprattutt’ ora, propri’ a ssu momentu
chi sta vita ti preparau lu cuntu…
Arridu ‘o stessu…non ti preoccupari,
ca gralimi giá troppi m’ agghjuttía,
com’ arridivi tu ‘nte jorn’ amari
e spocavi scrivendu ‘n’ atta poisia!
Tratto dall’antologia “Vuci Senza Tempu”,
Unione Poeti Dialettali Calabresi
Questo post é stato letto 8900 volte!
