Questo post é stato letto 24820 volte!
Giriava da’ matina a nuglia ura
ca pippa ‘mbucca e i fardegli ‘i fora
“Pipa” era pa genti forestera
pe’ nui “CUZZU” alla pajisana.
A so’ casa era jazzu ‘i tutti i genti
chi a società mischina ‘ssicutava,
u zingaru, u sciancatu, u penitenti
‘nda so’ buffetta ‘nu postu trovava.
‘Na birra frisca, offerta cu’ cori
i Politeglia ch’era so’ mugghieri
dopu ‘ncignava cu’ tanti palori
pe’ mi ‘lluntana ‘i milli penzeri.
Pecchi’ pur’igliu era sofferenti,
sutta ‘i ‘nu celu chi non canuscia,
luntanu da’ so’ terra e da’ so’ genti,
‘nda ogni storia ‘a so’ malincunia.
Però non fu tiratu da’ capizza,
a libertà ‘i nugliu nci svindiu
e si ndo mundu non dassau ricchizza
‘i dignità a tanti ndi struìu.
Tratto dall’antologia “Vuci Senza Tempu”,
Unione Poeti Dialettali Calabresi
Questo post é stato letto 24820 volte!
