Questo post é stato letto 19010 volte!
Oh bella chi d’’i belli si’ rigina
e umili si’ tu comu la lana,
si duci comu pendula ‘i racina
chi caccia vinu puru d’’a pampàna.
‘Nta lu rispiru toi nc’è l’aria i mari,
portata di li venti foresteri;
‘i sireni ti ndann’a mbidijàri
pacchì tu si pigghjàsti lu mistéri.
Occhj nigrégli comu notti scùra,
ognunu d’igli pari ‘na lumera,
chi faci lustru comu faci ‘a luna,
quandu la notti è tepita e sincera.
Oh bella di li belli e d’’i mbiàti,
vorrìa pammi t’abbrazzu milli voti,
mi ti sciancu ‘i carizzi e di basàti,
c’’o cori senz’’e tia stari non poti.
Vorrìa pammi ti portu a fraga ‘i mari,
e pa ‘na notti ‘i ti pozzu godiri..
pacchì saparrìa jeu chi ndaj’a fari,
abbasta ‘i chiudi l’occhj e mi suspiri…
Tratto dall’antologia “Vuci Senza Tempu”,
Unione Poeti Dialettali Calabresi
Questo post é stato letto 19010 volte!
