Questo post é stato letto 17910 volte!
(A mia figlia)
Je’ ti guardu la sira e la matina,
‘u jornu, ‘a notti e tutti li mumenti,
‘u nomu toi è ‘na musica, Martina,
chi mi nduci lu cori e i sentimenti.
Figghja, volia ‘i ti leju ‘nte penseri,
e mi sacciu chi è chi nda’ ‘nto cori,
pammi ti dassu sulu i cosi veri,
chi sunnu fatti ‘i nobili palori.
Volia ‘i sacciu s’è chjnu ‘i cosi duci,
o ndavi puru cosi ch’ennu amari;
se unu t’ama, non ti menti ‘n cruci,
nuglia cosa ti faci disijari.
Camina ‘o centru, e all’argini no stari;
pisa i palori, s’ennu petri, o meli:
quand’unu parla assai non ti fidari,
ca tanti voti sunnu com’’o feli.
Non jiri ncerca ‘i cosi chi non vidi,
ch’e cosi belli Diu t’’i misi ntornu,
mmuccia ‘a tristezza, vogghju semp’’i rridi,
c’’a vita passa ed è senza ritornu.
E pensa ca ‘nta vita è megghju ‘i duni,
puru quandu non è jornata ‘i festa;
non si minari a nugliu a scrapazzuni,
puru si nda’ ‘nto cori ‘na tempesta.
Figghja, volia ‘i ti leju ‘nte penseri,
‘i sacciu quandu sbagghj e quandu noni,
‘i trovi sempi boni cunsigghjeri,
e mi canusci li perzuni boni.
Questo post é stato letto 17910 volte!
