Questo post é stato letto 13050 volte!
Dedicata a lu me caru amicu Gianfrancu Parisi chi combatti cu la malatia
canusciuta cu lu nomu di “bambino farfalla” (Epidermolisi Bollosa).
A voti chjudu l’occhj a lu spitali
mi fuju di sti duluri disumani,
e mmaginu d’avir’un paru d’ali
o postu di sti cunzumati mani,
ca si farfalli simu peddaveru,
‘ndavissamu m’avim’assai culuri
e no chistu suffriri ccà severu,
chistu patiri sempri sti duluri,
a voti chjudu l’occhj e mi ricrîu
cridendumi leggeru Santu Diu!
Ma poi sentu chi subitu na caja
si dduma comu fussi na carcàra,
allura dicu a menti mia: – mannaja
perchi’ tu vita mia si tant’amara,
perchi’ già di figghjiolu mi feristi
e mi trattasti com’â li nimici,
perchi’ voi sempri pè mi sugnu tristi
perchi’ non pozzu esseri felici?
Avi du primu jornu chi nascia
chi ogni jornu t’â pigghj cu mia!
Ma esti forsi sulu nu mumentu
e puru si su comu fuss’î crita
mi pass’ogni dulur’e ogni sgumentu,
ogni rancuri versu chista vita,
perchi’ non sugnu natu pè odiari,
e campu, si, eu campu peddaveru
e tu duluri non mi poi piegari,
di li farfalli eu sugnu lu guerrieru,
armatu fin’e denti di coraggiu,
difendu la me vit’e lu me viaggiu!
Tratto dall’antologia “Vuci Senza Tempu”,
Unione Poeti Dialettali Calabresi
Questo post é stato letto 13050 volte!
