Questo post é stato letto 50760 volte!
A cura di Bruno Salvatore Lucisano
Ricordu a li me tempi la muntagna
Nta la chjanura di la Maiurana
Dilizia di frutti sapuriti
Cersi, fica russi e ficandiana.
Ricordu li sirati a lu crucicchiu:
Era lu postu di lu foritanu
Dicemu la preghiera a Gesù Cristu
E poi ognunu a lu nostru pagghjaru.
Bellizza di gliu virdi corallinu
Parìa lu paradisu di li fati
Cu l’aiutu di Diu mi addormentava
Nta lu russastru di li nuvolati.
E glia funtana frisca e cristallina
Cadendu nta gli rocchi levicati
Facìa nu sonu comu n’orchestrina
E rallegrava tutti li cuntrati.
Canusciu li cimi e li vasciati
Nta la cornici di lu suli d’oru
La cerasara chi parìa na zzita
Sutta lu cantu di lu risignolu.
Ora no nc’esti cchiù lu me pagghjaru
Mancu gliu ventaregliu chi firrìa
Sirati friddi e omini sgozzati
Comu li crapi nta la guccerìa.
Ora fin’u glia bella stagiuni
Pecchì rrivau na grandi venticata
Lu ventu portau morbu di lupara
E Cristu fu trafittu a la costata.
Quandu passi davanti a lu crucicchiu
Mentri la luna nta lu celu nchjana
Vorrìa pammi ti dugnu nu cunsigghju:
Jetta a pistola e chjanta na pirara.
Chigli è vita mpenduta nta nu palu
No mminazzari fai mi si rilassa
Cerchi ricchizzi? Vò tantu dinaru?
Ma la morti ti segui passa e spassa.
Va nta la cruci llenta li catini
Iapri lu cori libira li mani
Danci li stigli lu suli e la luna
E aria mi poti rispirari,
E poi pigghja a carci a to furtuna
Banduna a tutti torna nta lu chjanu
Ca nta nu mari di cristiani vivi
Tu si l’omu mortu nta gliu palu.
Luciano Nocera é nato a Motticella di Bruzzano Zeffirio (RC) il 19/12/1934 ed è morto il 20/07/2012.
Ha pubblicato due raccolte di poesie in lingua e in dialetto: “Viaggio nella memoria” e “La vita è un giro di giostra”. Ha ricevuto innumerevoli premi e riconoscimenti in tutta Italia, nel 2009 a Bova Marina si è aggiudicato il premio “Micu Pelle” alla carriera. E’ inserito nella “Letteratura calabrese per le scuole medie” di Pasquino Crupi, edita da Luigi Pellegrini.
Le poesie che leggerete sul sito sono state pubblicate nella raccolta in lingua e in dialetto motticellese “La vita è un giro di giostra”.
Questo post é stato letto 50760 volte!
