Questo post é stato letto 18380 volte!
Caru braseri di li tempi antichi,
preziosu ‘nta chigli anni ’i caristia,
quand’ ‘i mbernu, gliumandu ‘nta gli vichi,
cogghjvi li famigghj ‘ntorn’a ttia.
Com’eri bellu, vivu e arrussicatu,
quandu fora cjuccjava ‘u maistrali,
ma si facivi fumu, o eri mmussatu,
ti ventijava ‘a nanna cu’ fardali.
‘U nonnu Cicciu, mbiacu a tutti l’uri,
non sulu ‘i vinu, puru di marzala,
ndavia sempi ‘nte mani ‘u cjuccjaturi,
rrustendu pipi e surici ‘i supala.
Certi voti, cu criza, stuppa e ova
facia mprasti pa pedi scafigghjati,
e ognun’’i chigli, chi venia m’’u trova,
si dunava ddu’ nìchigli cuntati.
Patrima ‘nta glià cinnari mentia
baccafichi ‘nta carta oliata,
e ‘’nu cjarbu ‘nta ll’aria si sentia
chi mi paria ‘na cosa mbarzamata .
D’’i voti ‘u nonnu meu s’addormentava
ch’i pedi ‘nta la cinnari ffundati,
ma si nu brasicegliu apoi toccava,
sartava all’aria, e focu chi gridati!
E chigli notti, chi non c’era luci,
mama dicia ch’è ura già ‘i mi spogghju;
cuntava cunti, chi perdia la vuci,
mentri ‘a lampa moria ‘nta ll’urtim’ogghju.
Ma certi siri, padamuri ‘i dormu,
mama parlava du’ lupuminariu,
chi restava mmucciatu tutt’’u jornu
e ‘a notti mentia i casi allancallariu..
Ma ‘i tornu a chigli tempi jeu volia,
quandu scorciulijavamu vigliozza
e ‘a tavula ‘a famigghja s’arridia,
puru cu quattru coccia ‘i cannarozza.
Caru braseri meu, finiu gliu mundu,
non c’è ‘a famigghja ‘i quandu ‘nc’eri tu,
ma ogn’omu è sulu, staci jend’ ‘o fundu,
senza gliu Diu, chi ormai non s’usa cchjù.
Tratto dall’antologia “Vuci Senza Tempu”,
Unione Poeti Dialettali Calabresi
Questo post é stato letto 18380 volte!
