Questo post é stato letto 12870 volte!
Ê pedi vosti mi vorrìa assettari
m’arricchju tutti i fatti chi cuntati,
su cosi vecchji, ma a bbui tantu cari,
chi nta ssu cori ‘i sempi vi portàti.
Fatti di vita amara e marpatùta,
fatti di guerra, fami e caristia,
facèvu gutu a Ddiu pemmu v’ajuta,
ca sulu Ddiu aiutari vi potìa.
Allivi i giarra e fica calijàti
eranu pe morzellu e menzijornu,
a sira da fatiga cunzumati
ma cunzulati cu li figghji ‘ntornu.
Nta chilli siri friddi i tramuntana,
quandu stringìa lu misi di frevaru,
cu dicìa cunti e cu filava lana,
tutti arrotati avanti o focularu.
Sordi nte buggi vostri pocu o nenti
però lu cori d’amuri era chjinu,
pe’ figghji, pa’ mugghjieri, pe’ parenti
e lu rispettu ped’ogni vicinu.
Cangiàru chilli tempi o nui cangiamma,
avundi sunnu li capilli janchi,
und’ennu i nonni, avundi li mandamma?
Quandu tornàmu a casa simu stanchi
e non potimu certu sumportari
u vecchju cu la stessa litanìa.
Nto spiziu lu portamma, era da fari,
lla si non attu staci ‘ncumpagnìa.
È ntornijatu i medici e mpermeri,
mangia ad urariu e non nci manca nenti,
staci squetatu, libaru i penzeri,
cud illu ndavi tanta bella genti.
Quali mpermeri è megghjiu i na carizza,
quali medicu è megghjiu i n’abbasata,
cu mai poti nduciri l’amarizza
di st’anima ‘nnocenti carcerata?
L’unica curpa chi poti ndaviri,
è chilla da fatiga senza posa,
suffriu pemmu ti duna n’avveniri,
si tinni i spini mu ndi duna a rosa.
Onura patri e mamma dici Ddiu,
u dici o quintu di cumandamenti,
ma cchjù di d’unu forzi no’ lejìu
o si u lejìu no tinni bonu a menti.
Tratto dall’antologia “Vuci Senza Tempu”,
Unione Poeti Dialettali Calabresi
Questo post é stato letto 12870 volte!
