Questo post é stato letto 15210 volte!
Sugnu ‘nu giru lentu vasci’ ‘a mari,
chi prima ‘mu finisci, ‘n attru ‘ncigna,
‘na ricrijàta sutt’ ‘o lungomàri,
c’ ‘u sali chi mi pista sup’ ‘a ‘mpigna.
Sugnu ‘na chjacchjeràta ‘mmenz’ ‘a chjazza,
puru quandu da diri non c’è nenti,
tra cu’ rridi, cu’ sputti e cu’ si ‘ncazza,
senza nuglia ragiùni veramenti.
Sugnu ‘n appuntamentu ‘e ddu’ e menza,
pe’ ‘nu café ‘nduciùtu menz’ amàru,
‘nu sorsu chjin’ ‘i carma e di pacenzia,
‘na cugghjunètta cu ‘n amìcu caru.
Sugnu ‘nu passijàri forzi saggiu,
tra piazza Ruffu e corsu principali,
cu Garibaldi e Vintiquattru Maggiu,
chi mi pàrunu tutti tal’ e quali.
Sugnu ‘nu paisegliu piccirigliu,
chi quandu voli sap’ ‘i faci ‘u randi,
‘nu cori chi ‘ssumigghj’ ‘a ‘nu capigliu,
chi vola, a corp’ ‘i ventu, a tutt’ ‘i vandi.
Sugnu jornàt’ ‘i suli e di tempesta,
‘na notti carda e ‘n’attra fridda assai,
cu gliu castegliu all’artu, semp’ in festa,
chi dun’ amùri e caccia pen’ e guai.
Tratto dall’antologia “Vuci Senza Tempu”,
Unione Poeti Dialettali Calabresi
Questo post é stato letto 15210 volte!
