Questo post é stato letto 18190 volte!
Ciangji lu cori meu lacrimi amari
Si jarz’o celu un gridu a vuci rutta
Sbattutu i l’unda nta na ribb’e mari
Staci nu figghjoleddu a facci sutta
E’ mortu ma ddormentatu pari
Cu l’unda chi lu mbrazza e si rintana
Pietusa poi lu torn’a ccarizzari
Si senti di luntanu na campana
Nu toccu forti chi sapi di scornu
Di genti chi si gir’e ll’attru latu
Lu strazziu dura sulu pe nu jornu
All’arba appressu è già dimenticatu
Nti st’occhji toi sbarrati di la morti
Nc’è tutt’un mund’i peni e patimenti
Dormi nucenti ca la to mala sorti
E’ monitu futuru pe la genti
Dormi nucenti non ti risbigghjari
Ca nsiem’a ttia la speranza mori
Nnegasti nta lu fundu di lu mari
Pe curpa di persuni senza cori
Dormi nucenti dormi senza chjantu
Non nci fu nuddu mi ti ten’a manu
Moristi cu l’occhji chin’i schjantu
Riposa in paci angelu sirianu.
Tratto dall’antologia “Vuci Senza Tempu”,
Unione Poeti Dialettali Calabresi
Questo post é stato letto 18190 volte!
