Questo post é stato letto 16280 volte!
Glià supala i mastru Ngeniu
chjiudi tuttu u so podiri,
esti bella cumbinata
e curiusa da vidiri.
A pulizza cu so tempu
cu nà forfica e u cuzzuri,
pammi posanu l’arcegli
dassa sulu ddu piruni.
Nu rcegliuzzu smiriandu
vaji sartandu i ccà e di glià,
esti bellu chistu mundu!
quandu c’è a libertà!
Chistu rcegliu culuratu,
piccirigliu ma potenti
pammi veni ‘nt’à supala
ttraversau i continenti.
Pa rispettu a stà natura
chi criau a so genìa
torna sempri o stessu postu
pammi faci a folìa.
L’attri rcegli frotti frotti
jendu o giru tuttu u jornu,
quand’ è sira ‘nt’à supala
si ricogghjianu pa notti.
O cristianu, custa nenti
carculari c’à a natura
ti rigala sti mumenti,
pammi campi cu cchjù cura.
Sta supala i masrtu Ngeniu
nsigna puru nà morali
cà cu ndavi sentimentu
campa megghju di sò pari.
Tratto dall’antologia “Vuci Senza Tempu”,
Unione Poeti Dialettali Calabresi
Questo post é stato letto 16280 volte!
