Questo post é stato letto 6260 volte!
Si riaprono le scuole, al suono della campanella stormi di ragazzi sciamano rumorosi verso le proprie aule con alle spalle un voluminoso zainetto ricolmo di libri. Ai miei tempi non era così:
A SCOLA
Ca menti torn’arretu picciriḍḍu,
quand’jiv’a pedi a scola cu fantali,
curriva pe li strati com’on griḍḍu,
sartava lestu viculi e sipali.
Ca nnocca e cazatura senza sola,
cu sillabariu e nu quadern’a quatri,
nta nu niru catoju comu scola,
passava nucenteḍḍ’i me jornati.
Ssettat’a pisu nta nu banch’arretu,
chi cazi curti, tuttu sfacendatu,
non rinesciva mai mi staju quetu,
eru propriu nu focu mpiccicatu.
Mi moticava senza mai rigettu,
voliva pemmi spacc’u mund’interu,
mi staju fermu com’on catalettu,
non mi capacitava peddaveru.
Furunu anni chini di sapiri,
mumenti beḍḍi di lu me passatu,
pojsiava cu veru piaciri,
pe i numera nveci era negatu.
Finiva carchi vota la lezioni,
arret’a la lavagna a nginocchjuni:
ddui fett’i pani schittu a culazioni,
c’un filiceḍḍu d’ogghju e nenti cchjúni.
A scol’e tempi mei era mparari,
u non sapiri ti portava peni,
nu scoppuluni era salutari,
na tiratin’e ricchji era nu beni.
Cu li ricordi jia assai luntanu,
ḍḍu mod’i fari ormai esti cangiatu,
finìu u maestru cu la virga in manu,
na gridatina e veni denunciatu.
Rocco Criseo
Questo post é stato letto 6260 volte!
