Questo post é stato letto 17230 volte!
Na’ grazia voliva a sorta i mi faci,
aspettu, ma ancora non ma fici,
voliva nti stù mundu i trovu paci
e tutti mi campamu cchiu’ felici.
C’a’ vita e’ bella cu’ ‘na spera i luci,
a vita e’ bella aundi nc’esti a paci,
e’ sapurita s’esti duci duci,
si l’omu a manteni esti capaci.
Ma… l’omu e’ dotatu i spiritu malignu,
u riccu ndavi a siti du’ potiri,
chi paga caru caru u so’ pignu,
po’ misiru c’ o’ mbutta a mpoveriri.
Non ‘n cesti paci cchiu’ tra i vicini,
non cesti paci cchiu tra’ frati e soru,
non c’esti paci mancu tra cugini,
sta’ rrugna po’ a pagamu a pisu d’oru.
Non ‘n cesti paci cchiu’ tra frati e frati,
pe’ sti’ cosi cchiu’ ndi’ ntestardimu,
non si pigghiunu i palori i mamma e patri,
pe’ sta’ partita chi tutti perdimu.
Non ‘n cesti paci cchiu’ ntà ogni famigghia,
ca mancu si nda’ jenniri o nda’ nori,
stu mundu fattu di nu pigghia pigghia,
perchi simu carenti di valori.
Rivammu ntà nu puzzu senza fundu,
cu’ ciriveddu nostru chinu i straci,
ma quandu mi ndi vaju a l’attru mundu,
è l’unicu postu… aundi trovu paci.
Tratto dall’antologia “Vuci Senza Tempu”,
Unione Poeti Dialettali Calabria
Questo post é stato letto 17230 volte!
