Questo post é stato letto 19270 volte!
Nu jornu si trovaru facci a facci,
sup’a nu serru, la vita e la morti,
nta ll’occhj si guardaru comu pacci
e arrivaru prest’e ferra curti.
Lu primu passu lu fici la morti
chi si sentia, patruna di tutti
e sugnu lu distinu, sugn’ ‘a sorti,
sugnu l’arburu chi non duna frutti.
Difront’a mia tutti s’inchinaru,
rre, cavaleri e la grandi riggina,
ca quandu pass’u mundu trema paru
tremau lu presidenti e a megghju ndrina.
Portu cu mia li grandi scumpigghj
e puru patiment’e gran doluri
mi carrijai patri e puru figghj
l’onnipotenti DDiu nostru Signuri.
Dimmigliu tu si sai cu ndavi scampu?
nta tuttu l’univerzu, lu criatu
e poi si ndaju a sorti pemmu campu
a morti est’a patruna, u capu i statu.
Comu fai i ti senti la patruna
si rispundiu a vita ad’arridendu,
dimmi, cu ti cercau, quali parzuna,
cu vitt’a tia sempi jiu fujendu.
Guardati ntornu e dimmi na cosa
ca di stu serru tuttu po vidiri,
guarda sta terra, l’arburi, na rosa,
fussi pe mia ti facia speriri.
Ca nta stu mundu, tuttu quantu è vita,
guarda lu sul’i pisci di lu mari,
l’arcegli nta lu cielu, pur’a crita,
nte man’i ll’omu la vidi pallari.
E l’animali, l’acqua,puru a luna
nd’allumina la strata, lu caminu,
tu si na cosa chi ogni parzuna
ndavi mu ncuntra nta lu so distinu.
Tu si u scuru nta nu jornu i luci,
tempu di guerra nta na vit’e paci,
a undi passi, sempi viju cruci,
l’omu vicin’a tia, bonu no staci.
Tu sa chi ssi,nu jornu di la vita,
è nu passaggiu, chi nta llatta vai,
pe Ddiu’e chigli chi ndi vonnu beni,
sugnu sicuru, non morimu mai.
Tratto dall’antologia “Vuci Senza Tempu”,
Unione Poeti Dialettali Calabresi
Questo post é stato letto 19270 volte!
