Questo post é stato letto 2170 volte!
Mi ffacciu da finescia i bon matinu,
e tuttu quantu mi parra d’amuri,
nc’esti nu celu zzurru cristallinu,
nu suli chi mi bampa di caluri.
Nu fund’i mari chi mi fa ncantari,
na terra chi mi jinchi di sapuri,
virdi collini e sicca di hjumari,
pari na tila di nu gran pitturi.
Di fronti a tuttu stu beḍḍu vidiri,
u me penseru curri e va luntanu,
e figghji mei chi nd’epper’e partiri
e sunn’a mmenz’o friddu di Milanu.
D’un trattu eu non sentu cchjú caluri,
stu suli non mi sapi caddijari,
oh com’è lentu lu passar’i ll’uri,
chi mi ndi fazzu di stu celu e mari.
Chi mi ndi fazzu di stu ben’i Ddiu,
di sti bellizzi chi mi fannu mali,
s’a li promessi toi eu cchjú non criju,
chi guard’a ffari fora du facciali.
Oh terra bbandunata du Signuri,
dammi la forza mi ti pozz’amari,
scaccia du cori meu tutt’i pauri,
danc’e to figghji pani pe campari.
U tempu passa e puru la speranza,
na rondineḍḍa vola nto barcuni,
ormai eu sugnu chiusu nta na stanza,
di la finescia non mi ffacciu cchjúni.
di Rocco Criseo
Rocco Criseo (che fa anche lui parte dell’Unione Poeti Dialettali Calabresi), oltre a essere un poeta e anche scrittore appassionato di teatro, è stato paroliere e cantante in alcuni gruppi folkloristici. Insomma, una voce popolare, tra le più autorevoli della fascia Ionica.
Questo post é stato letto 2170 volte!
