Questo post é stato letto 4900 volte!
Quand’u Signuri Ddiu crijau l’omu
A simigghjanza soi lu vosi fari
U vitti poi sulu com’un nciomu
Ca non sapiva chi pisci pigghjari
Nci vinni a mmenti allura na pensata
Na costula du hjancu nci cacciau
All’attu poi nci fici na hjuhhjata
E meravigghja a fimmina crijau
Cangiau ccussì dill’omu lu destinu
E si sentìu re di l’universu
Cu na cumpagn’accantu u so caminu
Pigghjau all’istanti lu so giustu versu
Ddumila anni sunnu ormai passati
E a fimmina patruna diventau
Non nc’esti locu non nci su rribbati
C’u cor’i ll’omu idda non robbau
Matri mugghjeri soru senza pari
Ti jinchi a casa tutta di caluri
Non nc’è misteri chi non sapi fari
E’spadda sempri pront’a tutt’i l’uri
E’ tintinnìu a festa di campani
Bucali d’acqua chi ti caccia a siti
E’ furnu chi ti duna sempri pani
Palu chi meri sempri a la so viti
Prezius’e delicata com’a sita
N’arcubalenu esti di culuri
A fimmin’esti ‘u sali di la vita
Ndi partorìu na mamma cu duluri
Tratto dall’antologia “Vuci Senza Tempu”,
Unione Poeti Dialettali Calabresi
Questo post é stato letto 4900 volte!
