Questo post é stato letto 5930 volte!
C’era a strata avanti a mia,
fatta i petri, a nzelicatu
e nta casa undi criscia
puru u lettu undi fu natu.
C’ennu così nta glia ruga,
i ricordi i figghjolegliu,
ddu frinnestri fatt’i lignu,
nu mignan’e u portunegliu.
Na cucina chi daveru
sembra u quatru i nu pitturi
cu davanti u fucularu,
nu ciarnar’e u jujaturi.
Glià vicinu ddu tripodi
po nu spit’e na gravigghja
e nu menzu pignategliu
e mpenduta na cernigghja.
Po posatu supa o furnu
tuttu vecchju e anniggricatu
c’è nu caglipu mpendutu
i tant’anni abbandunatu.
E a pala, na chjudenda,
na lumera supa a praca,
na padeglia e na marmitta,
u campanu di na crapa.
E guardandu po’ pa ssupa
chi ti viju u sarzizzaru
e pensai gliu ben’ì DDiu,
i salami chi curaru.
E nta chigliu stipicegliu
tutti i ferra du misteri,
i fascegli da ricotta,
na buttigghj’e ddu bicchjeri.
Pochi chjova e nu martegliu,
u serracchju du sapuni,
a majiglia e na suppera,
po u quagghju e nu serruni.
Lattu jornu m’affacciai
e guardava chistu quatru
e nta chista testa mia
mi tornava lu passatu.
Tutti quanti li ricordi
cu gl’affettu e gliu rridiri,
li cunsigghj i chigli vecchj,
l’onesta chi cchjù non vidi.
Quantu cunti e cunticegli,
quant’amuri e quanta fidi,
li sorrisi di la genti,
mo si cunt’e cu ti cridi.
Pe quant’anni nd’assettamma
tutti quanti a nu tundinu
e mangiamma nta nu piattu
senza carn’e senza vinu.
E mentutu o primu postu
c’era sempi la famigghja,
mo si penz’e tempi d’oji
ccocchj cosa a mia mi pigghja.
E allura dapru l’occhj
e non penzu cchju’o passatu
e mi viju comu sugnu
nta sti jorna ntossicatu.
Ma non pozzu fari nenti,
esti u mundu chi cangiàu,
c’è nu sulu DDiu, lu sordu,
chi’a la genti sbalestràu.
Voggh’j torn’o focularu,
nta glia cucineglia mia
mu mi mbarru l’occhj i fumu
e mu ciangiu chi perdia.
Tratto dall’antologia “Vuci Senza Tempu”,
Unione Poeti Dialettali Calabresi
Questo post é stato letto 5930 volte!
