Questo post é stato letto 13970 volte!
Seguendu i pedati Toi, Patri meu,
trovu ‘a forza u vaju avanti ancora!
I jorna e i notti mei, chjni i ‘mprevisti,
penzandu a Ttìa sunnu rosi e hjuri,
cumpetti ’ndorati d’agghjuttiri.
‘U sangu stessu chi scurri dint’e vini,
i penzeri cocenti c’affollanu ‘u cervellu;
sunnu l‘amuri e ‘a poesia d’a vita.
Palori novi, emozioni forti e
‘mpossibuli i cuntari, sussurti i cori,
passioni ardenti chi nullu poti mai ‘stutari.
L’umbra Tua…Patri meu,
mi segui a tutti l’uri: è ‘na lama tagghjenti
chi mi tràpana ‘u cori e ‘a menti e
m’alluci nte senteri accidentati d’a vita…spessu scuri.
Scrivi sta manu mia melodjì novi,
spargi cunsigghj a tutti…bboni e mali
‘nzuppandu i fogghji janchi d’a vita
c’u lacrimi i sangu e focu
chi schjioppanu d’u cori feritu
chi nullu poti ormai guariri…tranni Tìa!
Non Ti domandu cchjù…ormai
pecchì stu mundu vaji a peggiorari,
pecchì i mammi ammazzanu i figghjoli,
pecchì l’omu è peju d’i nimali.
I quandu a statua tua grunda gralimi i sangu
chi nullu sà spiegari,m’accorgia…Patri meu,
ca Ti misimu sup’a cruci n’atta vota.
Tratto dall’antologia “Vuci Senza Tempu”,
Unione Poeti Dialettali Calabresi
Questo post é stato letto 13970 volte!
