Questo post é stato letto 53940 volte!
Tutti chisti paroli
chi avimu,non su novi;
la radica la trovi
a tanti lingui.
Nui simu ‘ntra l’Italia,
e fummu Greci puru:
e quanti ci ndi furu
Genti strani.
E quandu fummu Greci
tremau,parbeu,lu mundu;
e quandu sputu tundu ancora trema.
E quanti atri Nazzioni
‘ndi vinnaru d’intornu
di Orienti e Menz’ijornu,
e Tramuntana?
‘Nci furu Saracini,
‘nci furu li Nurmanni,
e pe tanti e tant’anni li Spagnoli.
Nci furu li Tudischi,
nci furu li Romani,
chi non ficiru pani
a chistu Celu.
A ,’urtimata poi
vinnaru li franzisi
ndi vinnaru li ‘Ngrisi
e tanti truppi,
Prussiani e Muscuviti;
vittimu li Pulacchi
e puru di Cusacchi
‘nci ndi furu.
Di tutti chisti lingui
mu ndi pigghiai na picca
vidi quantu su ricca
di palori.
E’ linga universali
la lingua calavrisa;
ma vi ca pemmu è ‘ntisa
‘nci vò testa.
Giovanni Conia,Galatro, 1834.
Questo post é stato letto 53940 volte!
