Questo post é stato letto 4320 volte!
Fu strana ‘sta staggiùni.
Puru sutta all’ombrelloni
tutti quanti ‘i cristiani
non parràvinu ‘i pallùni,
ma quasi chi ‘rruàvinu ê mani
parrandu ‘i Renzi, Salvini e Meloni.
Chi burdèllu, ‘ndi ‘sta televisioni!
Matìna, menziornu e sira,
sempri ‘a stessa litanìa:
“Vutàti pi mi, vutàti pi mia!”.
Gira e vota, vota e gira,
si parra suli ‘i elezioni.
Berlusconi prumettìu solennementi
chi ‘ndi ‘mbascia ‘i tassi a tutti,
milli euri p’i nostri vecchiarèddhi,
mi ‘ndi ‘ggiusta tutti ‘i denti,
chi ‘ndi jinchi puru ‘i ‘bbutti
quattru cassalòri e tri padèddhi!
Letta, poi, mancu ‘i cani, Signuri!
Pari ‘u prèviti chi dici Missa.
E diri chi faciva u prufissuri!
Puru Calenda, chi pari fissa,
‘u bbandunàu dopu na para d’uri.
Cinque Stelle, siti carni o siti pisci?
Dopu ddui legislaturi e tri guverni
non si ‘rrinèsci mi si capisci.
Ognunu parra, prumetti e dici:
Toglieremo il canone Rai!
Aumenteremo il reddito di cittadinanza!
Aboliremo l’ICI!
Ma sintìti a mia, cari amici:
Ognunu ‘i chisti, quandu vai,
‘i opposizione o ‘i maggioranza,
si ndi futti ‘i mia e ‘i vui.
Pensa sulu p’a so’ panza…
Elezioni nazionali,
c’è aria di rinnovamento!
Si vota per il nuovo Parlamento!
Ma ‘i vidisti? Quattru tracandàli!
A cu’ cazzu vôi vutàri?
di Natino Tripodi
Le parole Dialettali Calabresi
Questo post é stato letto 4320 volte!
