Questo post é stato letto 6140 volte!
Éu chi pe’ ttia scrivìa frasi d’amuri
e chi cantài li to’ bellizzi rari,
ora nt’o cori sentu ‘n’abrusciuri,
brusciuri chi mi faci penijari.
Si’ bella e chi ti servi ssa bellizza
e ssu profumu toi di milli adduri
poti ‘nduciri mai chist’amarizza?
Poti carmari mai chistu doluri?
Si fù a Milanu, ti tinni prisenti,
si fù a Turinu, penzava sempi a ttia
e si fù a Roma a mmenzu a tanta genti,
nullu mai ti cassau da’ menti mia.
Rigina ti chjamai e ti chjamu mata.
rigina di nu regnu naturali,
però mò chissa vesta tua è macchiata
ed ammorbata si’ da milli mali.
Macchiata si’ di sangu jornu a jornu
ed allordata da gralimi amari,
‘u mundu parra ‘i tia e mi veni u scornu,
vorria pemmu ti pozzu rinnegari.
Ma chi su’ pacciu!, chi staju dicendu?
Poti nu figghju ‘a mamma rinnegari ?
Puru ca suffru e ca staju morendu,
tu mi criscisti e ccà vogghju restari.
Vogghju lottari ccani ‘nzemi a ttia,
ssa vesta lorda mu ti poi mutari
e pemmu sani d’ogni malatia
senza cagiuni cchjù di virgognari.
E pregu ca ancora atti figghji toi
‘nta chista lotta ndi vonnu ajiutari,
si simu tanti, certu prima o poi
nu novu suli vidimu spuntari.
Suli chi a tutti sapi cardijari,
suli chi sana d’ogni malatia.
Suli chi a ttia ti fa sprendurijari,
a ttia Calabria, amata terra mia.
Tratto dall’antologia “Vuci Senza Tempu”,
Unione Poeti Dialettali Calabresi
Questo post é stato letto 6140 volte!
