Questo post é stato letto 16440 volte!
Vitti ‘na fimmaneglia senz’ etati
non era figghjoleglia e non crisciuta,
ch’i culuri d’ ’u mbernu, non d’ ‘a ‘stati,
e ‘a pegli comu quandu ‘ngialinuta.
E ‘ntà ‘na cofineglia scumbogghjata
portava chjanti e sulu ‘n’arrisata.
S’avvicinav’a mia cu’ passu lentu
e mentr’iglia ‘ntà ll’occhj mi guardava
mi ‘ntisi ca du’ friddu ‘ntozzulava,
l’anima mia mi parzi nu turmentu.
Non capiscia cu era e chi volia
ma pur’ ‘a terra tremava cu’ mmia.
Mi dissi: “Sugnu chiglia chi ‘mbocati
quandu d’ ‘a vita cchjù nenti ‘ndaviti,
e ogni jòrnu novu smaliditi
pecchì li peni sunnu triplicati.
Allura com’ ‘o meli sugnu duci
ca sugnu chiglia chi vi cacci’ ‘a cruci.
‘Ntà chistu mundu chjn’ ‘i cosi storti
undi pari ca vinci lu marvaggiu
eu sugnu a fini certa d’ogni viaggiu
‘a sula cosa giusta, sugnu ‘a morti”!
Si dissi: Mi rispund’a ‘na domanda
prima mu ti ndi vai pe’ natta vanda?
“Chissa domanda tua non avi ngagghja
-dissi- mu trasi spera di risposta
diri non pozzu, e sai n’ ‘o fazz’apposta,
si sugnu terra fertili e curtagghja
und’ ‘a sumenza mori e faci fruttu,
o sugnu focu, chi distruggi tuttu”.
Tratto dall’antologia “Vuci Senza Tempu”,
Unione Poeti Dialettali Calabresi
Questo post é stato letto 16440 volte!
