Questo post é stato letto 18210 volte!
N’comu vitti l’analisi,
a figghja ‘i don Saveriu
si ‘ccorgìu ch’era ‘ncinta,
….ma ‘ncinta supr’o’ seriu.
So’ mamma, sbenturata,
ch’era malata ‘i cori,
pigghjau ‘na dogghja-colica
chi mi parìa ca mori.
Quandu tornau Saveriu,
ch’i nervi già spostati,
si scotulau d’a figghja
‘nu fraccu ‘i vastunati.
“Cu fu ‘ssu ‘ccipp’’i ‘ndegnu,
‘ssu pezz’’i cosa lorda,
ca vogghju, si mi ‘mbatti,
m’u fazz’’i si ricorda!”
Doppu ‘chisti palori,
finisci di gridari
ca, propiu avant’a porta,
si ferma ‘na Ferrari,
e ‘i sta machina scindi
‘nu signori eleganti,
chi, cu’ modi gentili,
pigghja e si faci avanti.
“Signori, eu sugn’a causa
‘i stu fattu ‘mprevistu,
ma volerrìa ’i riparu,
pa’ quant’è veru Cristu,
ma siccome già sugnu
….nt’a certi situazioni,
non pozzu riparari
cu’ attri matrimoni.
Perciò, si nesci masculu,
si ‘ntestu ddu’ giardini
cu arburi d’arangi
e attri ‘i mandarini,
‘nu negoziu nt’o centru
‘rredatu ’i tuttu puntu
e centumila euri
si verzu supr’’o cuntu.
Si n’beci esti ‘na fimmana,
n’albergu si ‘ntestamu
e n’attri centumila
nt’o cuntu si verzamu.
Ancora vogghju ‘i ‘ggiungiu
n’appartamentu a mari
e n’attru supr’a Sila….
Chi attru pozzu fari?
Si doppu….pa’ disgrazia,
….pa’ ‘nu malu distinu….”
‘ccà ‘nterveni Saveriu,
n’pedi avant’’o caminu:
“Si nd’avi pammi sporchja
e ‘i si perdi sta dota,
non vogghju ‘i vi dispiaci….
PROVATI N’ATTRA VOTA!”
Tratto dall’antologia “Vuci Senza Tempu”,
Unione Poeti Dialettali Calabresi
Questo post é stato letto 18210 volte!
